​कैलालीको लम्की क्षेत्रमा क्रियाशील लायन्स क्लबहरूले संयुक्त रूपमा खाद्यान्न वितरण तथा वृक्षारोपण कार्यक्रम सम्पन्न गरेका छन्। ​

लायन्स क्लब्स इन्टरनेसनल डिस्ट्रिक्ट ३२५ N, एरिया नं. ५ अन्तर्गतका पाँचवटा स्थानीय क्लबहरूको आयोजनामा बिहीबार भोकमरीविरुद्धको पहल' र 'एक लायन, एक फलफूलको बिरुवा अभियान' सञ्चालन गरिएको हो। ​संयुक्त अभियान अन्तर्गत लम्कीचुहा-१ भुरुवाकी क्यान्सर रोगका कारण मृत्यु भएकी धनी दमाईको परिवारलाई दैनिक उपभोग्य खाद्यान्न सामग्रीहरू वितरण गरिएको थियो।

आर्थिक रूपमा थला परेको उक्त विपन्न परिवारको राहतका लागि क्लबहरूले चामल, दाल, आलु र खानेतेल जस्ता खाद्यान्न सहयोग गरेका हुन्। ​यस्तै, पर्यावरण संरक्षणलाई टेवा पुर्‍याउने उद्देश्यले लमकीचुहा-१ लमकीमा अवस्थित चन्द्र मौलेश्वर मन्दिर परिसरमा वृक्षारोपण गरिएको छ। मन्दिर वरपर हरियाली र धार्मिक वातावरणलाई थप स्वच्छ बनाउन क्लबका सदस्यहरूले आँप, अम्बा लगायतका विभिन्न प्रजातिका फलफूलका बिरुवाहरू रोपेका हुन्। ​

कार्यक्रममा लायन्स डिस्ट्रिक्टका वरिष्ठ कार्यकारी प्रमुख ला० सरोजकुमार शाह, डिस्ट्रिक्ट प्रमुख ला० देवकी डाँगी, क्षेत्रीय अध्यक्ष ला० लक्ष्मण प्रसाद रेग्मी र डिस्ट्रिक्ट अध्यक्ष ला० बल बहादुर थापाको उपस्थिति थियो।

​त्यसैगरी, आयोजक क्लबका अध्यक्षहरू क्रमशः ला० मोहन बुढाथाकी, ला० जयन्ती बि.सी., ला० बम बहादुर शाही, ला० राज बहादुर थापा र ला० यशोदा सिंह शाहसहित स्थानीय प्रतिनिधिको सक्रिय सहभागिता रहेको थियो। ​

एकै ठाउँका पाँचवटा क्लबहरू मिलेर पीडित परिवारलाई मलम लगाउने र धार्मिक क्षेत्रमा हरियाली प्रवर्द्धन गर्ने गरी गरेको यो संयुक्त सामाजिक कार्यको स्थानीय स्तरमा निकै प्रशंसा गरिएको छ।